வாழ்க்கைக்கு வழிகாட்டும் வள்ளுவம்

பசியில் எனக்கு யாரோ ஊட்டிய உணவு//

பகுத்துண்டு பல்லுயிர் ஓம்புதல் !//

ஆபத்தில் கைகொடுத்த நண்பன்//

உடுக்கை இழந்தவன் கைபோல !//

எம்மக்கள் மழலைச் சொல் எனக்கு//

குழலினும் யாழினும் இனிது!//

எம்மக்களை சான்றோர் புகழ்ந்திட //

ஈன்றபொழுதில் பெரிதுவக்கும் என்னவள்!//

கிராமத்தின் எல்லை தாண்டி நான்// 

கெடில் விழுசெல்வம் கல்வி !//

பசுமை கழனிகளில் கால் வைத்தபோது// 

உழுதுண்டு வாழ்வாரே !//

என் காதல் வாழ்க்கை//

வாலெயிறு ஊறிய நீர்//

என் நட்பு வட்டம்//

காமுறுவர் கற்றறிந்தார்//

நான் விலகி நின்ற நேரம்//

சிற்றினம் அஞ்சும் பெருமை//

எப்போதும் சிரித்த முகமாம் எனக்கு//

இடுக்கண் வருங்கால் நகுதற் பொருட்டு//

என் அனுபவ தெளிவு//

மக்களே பொல்வர் கயவர்//

வள்ளுவம் எடுத்தியம்பிய இன்குறள்//

அல்லாது வேறெது வாழ்விற்கு - வழி ?!//

ஆக்கியோன்

சுந்தர இராஜசேகரன்

நீலப்பாடி கிராமம்

நாகை மாவட்டம்

இந்த கவிதை கதம்பம் இதழில் இடம் பெற்றது.

இசை!

ஆழ்ந்த அமைதியில் 

இதயத்தின் துடிப்பு !

தனித்து இருக்கையில் 

இலைகளின் அசைவு!

ஆழ்ந்த நித்திரைக்கான முயற்சியில் 

கடிகார முள்ளின் நகர்வுகள்!

தவித்திருக்கையில் 

அணைப்பின் கதகதப்பில் மூச்சு !

மரணத்தின் வாயிலை 

தொட்டுத்திரும்பி 

கண் விழிக்கையில் 

பிறந்த குழந்தையின் அழுகுரல் !

குளிர் உடலை குத்திக்கிழிக்கையில் சருகுகளை கூட்டி எரியும் 

நெருப்பின் ஒலி !

ஆக மொத்தம் 

உடலுக்கும் உயிருக்கும் 

ஆறுதலும் தேறுதலுமாக என்றுமே ...

இயற்கை எப்போதும் 

நம்மோடு பேசும் மொழி !

இறையோடு இசைந்து இருக்க 

எங்கும் இழையோட வேண்டியது - இசை!

.

இறைவன் திருவருளால்!.

RJ ராஜா (எ) சுந்தர ராஜசேகரன்

ரிச்மண்ட தமிழ் சங்கத்தின் டிசம்பர் மாத கதம்பம் இதழில் இந்த கவிதையை இடம்பெற செய்த நல் உள்ளங்களுக்கு நன்றி.