சிவசோடச நாமாவளி

 திருச்சிற்றம்பலம்

பழந்தமிழ்ப்புலவர்

பு.ப.மாசிலாமணி முதலியார்

அவர்களால் இயற்றப்பட்டு

1904 ஆம் ஆண்டு வெளியிடப்பட்ட

புதுப்பாளையம்

அருள்தரும் அங்கயற்கண்ணி உடனமர் அருள்மிகு அகத்தீசுவரர்

தோத்திரப் பாமாலை எனும் நூலில் உள்ள

சிவசோடச நாமாவளி

சிவ சிவ சங்கர அகத்தீசா

சிவகுரு தற்பரா ஜகத்தீசா

தவமுனியோர்களும் தொழும் ஈசா

பவமதையொழித்திடும் பிரகாசா

ஆனந்த நர்த்தன மிடும் பாதா

அருமாமறை முறை யிடும் போதா

அகத்தீசனை நிதம் போற்றுவரே

இகத்தினில் தொல்வினை மாற்றுவரே

சோமனை சூடிய சுந்தரனே

சுரரிடர் தீர்த்த கங்காதரனே

காலனை யெரித்திட்ட கங்காளா

பாமரனென்வினை தீர்த்தாளா

அகத்தீசாவென வல்லவரே

ஜகத்தினவர் மிக நல்லவரே

அகத்தீசனையகம் வைத்தவரே

சுகத்தினில் வெகுநலம் மெய்த்தவரே

அகத்தீசாவென நாடுவரே

அந்தமாம் சாயுச்யம் கூடுவரே

அகத்தீசனை நினை மோனியரே

அருளது பெறலாம் ஞானியரே

அகத்தீசனை தொழு பெரியவரே

ஆனந்த சுகத்துக் குரியவரே

அகத்தீசாவென எண்ணுவரே

அருட்பாலாமிர்தம் உண்ணுவரே

அகத்தீசாவென சொல்பவரே

அந்தகன் றன்னையும் வெல்பவரே

அகத்தீசாவென நின்றவரே

ஆணவமும் மலம் வென்றவரே

அகத்தீசனைப்பணி பக்தர்களே

அருளது பெறற்குரி முக்தர்களே

பரஞ்சுடர் தரிசனம் கண்டவரே

பாவமனைத்தையும் விண்டவரே

திருச்சிற்றம்பலம்